CERITA DALAM BAHASA BANJAR

MENCUBA KADA BEBAYAR

Utoh itu tamasuk urang nang kada tapi cariwit wan gawian. Samunyaan usaha dicubanya, asal kawa jadi duit gasan mahidupi anak bini di rumah.

Wayah musim limau ini Utoh bausaha bajualan limau. Ada limau Sungai Madang, limau Anjir dan ada jua limau Kalampayan Astambul.

Supaya banyak hujungannya, Utoh manukari limau jualannya itu langsung matan kabunnya. Tapi rupanya Utoh kada saurangan, banyak jua urang lain nang bajual limau. Karna banyak saingan itulah maka rancak banar Utoh tapaksa bajual murah asal tabulik mudal, daripada limaunya burukan karna kada payu lalu inya rugi. Ngalu pulang kapala Utoh mamikirakan nangkaya apa supaya kawa manarik pembeli. Wayah tatamu wan Garbus inya bakisah tantang masalahnya itu.

"Mustinya ikam banyak hujungnya karna ikam langsung manukari matan kabunnya," ujar Garbus.

"Aku kada tahu jua Bus ai, jangankan bahujung atawa tabulik mudal bahkan dalam samingguan ini rugi tarus," ujar Utoh takurasam muha pina sadih.

"Mungkin ikam salah taktik ma-atur barang jualan ikam itu, makanya rugi tarus," ujar Garbus.

"Padahal limaunya manis-manis saharusnya urang barabut manukarinya," ujar Utoh.

"Biarpun limaunya manis-manis, amun prumusinya kurang, tatap haja urang kada hakun manukar," ujar Garbus.

"Prumusi kaya apa Bus? Sudah jua aku tulisi di karton, bahwa limaunya manis tapi tatap haja urang kada hakun baparak," ujar Utoh sadih.

"Bulihlah kalu urang manguyak sabigi handak marasai?" ujar Garbus pulang.

"Kalu manguyak ba-arti manukar dan harus bayar," ujar Utoh.

"Nah itulah sababnya kanapa urang kada manukari limau ikam, karna ikam kada mau kurang labih. Urang kada hakun manukar kucing dalam karung Toh ai. Saharusnya ikam bariakan haja urang marasani," ujar Garbus mambari nasihat.

Oooooo... kaya itu kah Bus. Tarima kasih Bus lah, ayu ja kaina aku turuti papadahan ikam itu," ujar Utoh manyalami Garbus langsung parmisi tulak handak bajualan.

Kamariannya Utoh datang pulang manamui Garbus, makin marista haja muhanya.

"Nangkaya apa Toh, banyaklah urang manggarubungi?" ujar Garbus sambil manyirit ka bakul limau Utoh nang puang.

"Bujur haja banyak nang bagarubung wan jualanku habis, tapi aku tatap rugi ganal," ujar Utoh sadih.

"Hau, kanapa maka nangkaya itu?" ujar Garbus batakun.

"Sasuai papadahan ikam tadi supaya manarik urang nang handak manukar maka aku bakuriak : limau manis, limau Madang, bulih buktiakan, silakah cuba kada bayar perai haja," ujar Utoh pina parau suaranya.

"Rupanya karna bulih cuba kada bayar itulah maka bagarubung balawi-lawi urang datangan mancubanya. Ada nang ma-ambil sabigi dan ada jua nang dua bigi, ahirnya babakul-bakul habis. Sedangkan nang manukari hanya dua talu ikung haja," ujar Utoh sadih.

"Ooooo......... jadi karna banyak nang mancuba perai itulah maka limau ikam habis tapi rugi. Ujar urang bahari kada usah sakit hati, biar rugi di acan tapi bahujung di asam, jadi biarpun ikam rugi babakul-bakul limau tapi pahalanya cagar ikam nikmati di ahirat kaina" ujar Garbus mahibur Utoh.

"Rupanya sudah nasibku sakit balalawasan" ujar Utoh taungut.